SivagangaiDistrict.com

Login Here


Home News Papers Sivagangai Dinakaran Tamil News Paper
Sivagangai District Tamil News Papers
Dinakaran.com |24 Jan 2017


Dinakaran No.1 Tamil Daily News Paper - Tamil News Paper | Tamil Latest News | India News | World News |   Breaking News | Latest Headlines
  • 2015ம் ஆண்டுக்கான இழப்பீடு இதுவரை வழங்கவில்லை கடும் பாதிப்பில் விவசாயிகள்

    சிவகங்கை: சிவகங்கை மாவட்டத்தில் 2015ம் ஆண்டு வறட்சியால் பாதிக்கப்பட்ட விவசாயிகளுக்கான இழப்பீடு இதுவரை வழங்கப்படவில்லை. 2016ம் ஆண்டும் விவசாயமும் பொய்த்துப்போனதால் விவசாயிகள் கடுமையாக பாதிக்கப்பட்டுள்ளனர்.கடந்த 2015ம் ஆண்டில் நெல் விவசாயம் சுமார் 62 ஆயிரம் எக்டேர் நிலத்தில் செய்யப்பட்டது. வடகிழக்கு பருவமழை காலத்தில் மொத்தமுள்ள கண்மாய்களில் 4 சதவீதம் கண்மாய்கள் மட்டுமே நிறைந்தன. மற்ற கண்மாய்களில் குறைவான நீரே காணப்பட்டது.சிங்கம்புணரி, எஸ்.புதூர், சிவகங்கை, திருப்புவனம், திருப்பத்தூர், மானாமதுரை, காளையார்கோவில், தேவகோட்டை, இளையான்குடி உள்ளிட்ட மாவட்டத்தின் பெரும்பாலான ஒன்றியங்களில் விவசாயத்திற்கான போதிய மழை இல்லை. இதையடுத்து பயிர்களை காப்பாற்ற மோட்டார் மூலம் நீரை விலைக்கு வாங்கி பாய்ச்சுவது உள்ளிட்ட பல்வேறு முயற்சிகளை விவசாயிகள் செய்தனர்.இருப்பினும் பயிர்களை காப்பாற்ற முடியவில்லை. பெரியாறு கால்வாய் பகுதிகள், வைகை பாசன பகுதிகளிலும் இதே நிலையே காணப்பட்டது. மழை இல்லாமல் சுமார் 70 சதவீத பயிர்களும், குலைநோய் தாக்குதலால் 20 சதவீத பயிர்களும் முழுமையாக பாதிக்கப்பட்டன. கருகிய பயிர்கள் வேறு வழியில்லாமல் கால்நடைகளுக்கு இரையாக்கப்பட்டன.இதையடுத்து பயிர் இன்சூரன்ஸ் இழப்பீட்டை முழுமையாக வழங்க வேண்டும் என்றும், மாவட்டத்தை வறட்சி பாதித்த மாவட்டமாக அறிவிக்க வேண்டும் என்றும் விவசாயிகள் கோரிக்கை விடுத்தனர். ஆனால் பாதிக்கப்பட்ட விவசாயிகளுக்கு இரண்டு ஆண்டுகளாகியும் இதுவரை இழப்பீடு வழங்கப்படவில்லை.2015ம் ஆண்டிற்கான இழப்பீட்டை இதுவரை வழங்காமல் உள்ளது விவசாயிகளுக்கு கடும் பாதிப்பை ஏற்படுத்தியுள்ளது. இந்நிலையில் 2016ம் ஆண்டும் சுமார் 64 ஆயிரம் எக்டேர் நிலத்தில் பயிர் செய்யப்பட்ட நெல் விவசாயமும் முழுமையாக பாதிப்படைந்துள்ளது. முற்றிலும் மழை இல்லாமல் பயிர்கள் அனைத்தும் ஆரம்ப நிலையிலேயே கருகிப்போனது. தொடர்ந்து விவசாயம் பொய்த்து வருவதும், ஆண்டுதோறும் வறட்சியால் பாதிக்கப்பட்ட விவசாயிகளுக்கு பல ஆண்டுகள் கழித்து இழப்பீடு வழங்கி வருவதும் விவசாயிகளை அதிர்ச்சியடைய செய்துள்ளது.தமிழ்நாடு விவசாயிகள் சங்க மாவட்ட செயலாளர் வீரபாண்டியன் கூறியதாவது, ‘கடந்த சில ஆண்டுகளாக ஆரம்பத்தில் பெய்த கனமழையை நம்பி தொடர்ந்து மழை பெய்யும் என்ற நம்பிக்கையில் பயிர் செய்யப்பட்டது. ஆனால் போதிய மழை இல்லாமல் பயிர்கள் கருகி வருவது வாடிக்கையாகிவிட்டது. விவசாயத்திற்கு செலவு செய்யும் பணம் வீண் என்ற மனநிலை விவசாயிகளுக்கு ஏற்பட்டுள்ளது. கடந்த 2013ம் ஆண்டு பாதிக்கப்பட்ட பயிர்களுக்கு 2015ல் இழப்பீடு வழங்கினர். 2014ம் ஆண்டிற்கு இழப்பீடு இல்லை என தற்போது கூறியுள்ளனர். 2015ம் ஆண்டுக்கான இழப்பீட்டை இதுவரை வழங்காமல் உள்ளனர். இதுபோல் தேவையற்ற கால தாமதம் இல்லாமல், கணக்கீட்டில் எவ்வித குளறுபடியும் இல்லாமல் இழப்பீட்டு பணத்தை விரைந்து வழங்க வேண்டும். விவசாயிகள் அனைத்து வங்கிகளிலும் வாங்கியுள்ள பயிர்க்கடன், விவசாய நகைக்கடன்களை தள்ளுபடி செய்ய வேண்டும்’ என்றார்.



  • ஜல்லிக்கட்டு தடையை நீக்க வலியுறுத்தி காரைக்குடி, பள்ளத்தூரில் மாணவர்கள் மறியல் ஆர்ப்பாட்டம் நடத்தியதால் பரபரப்பு

    காரைக்குடி:  ஜல்லிக்கட்டு தடையை நீக்க வேண்டும் என வலியுறுத்தி மாணவர்கள் தொடர் போராட்டம் நடத்தி வருகிறனர். இந்நிலையில் அலங்காநல்லூரில் ஜல்லிக்கட்டு ஆர்வலர்கள் மீது போலீஸ் தடியடி நடத்தியதை தொடர்ந்து போராட்டம் தீவிரம் அடைந்தது. காரைக்குடியில் உள்ள அழகப்பா அரசு பொறியியல் கல்லூரி, அழகப்பா அரசு கலைக்கல்லூரி, அழகப்பா அரசு பாலிடெக்னிக் மாணவர்கள் 5000க்கும் மேற்பட்டவர்கள் 3 கி.மீ. ஊர்வலமாக நடந்து வந்து புதிய பஸ்ஸ்டாண்ட் அருகே ஆர்ப்பாட்டம் நடத்தினர். மேலும் பேரணி வந்து கொண்டு இருந்தபோது கோர்ட் எதிரே அமர்ந்து ஜல்லிக்கட்டு தடையை நீக்க வேண்டும் என கோஷம் எழுப்பினர். ஆர்ப்பட்டம் நடந்து கொண்டு இருந்த போது ஜல்லிக்கட்டு ஆர்வலர் கார்த்தி என்பவர் தனது உடலில் பெட்ரோலை ஊற்றி தீ குளிக்க முயன்றதால் பரபரப்பு ஏற்பட்டது.அவரை போலீசார் மீட்டு மருத்துவமனைக்கு அழைத்துச்சென்றனர். ஜல்லிக்கட்டு தடையை நீக்க வேண்டும், பீட்டாவை தடை செய்ய வேண்டும். தமிழக எம்.பி.க்கள் ராஜினாமா செய்ய வேண்டும் என கோஷம் எழுப்பினர். வக்கீல்கள் கோர்ட் புறகணிப்பு செய்து ஆர்ப்பாட்டத்துக்கு ஆதரவு தெரிவித்தனர்.காரைக்குடி அருகே பள்ளத்தூரில் பொதுமக்கள் மற்றும் தனியார் பாலிடெக்னிக் மாணவர்கள் 500க்கும் மேற்பட்டவர்கள் ஆர்ப்பாட்டம் செய்தனர். கோவிலூர் பகுதியில் உள்ள தனியார் கல்லூரி மாணவர்கள் உள்ளிருப்பு போராட்டம் நடத்தினர். கும்மங்குடி பகுதியில் உள்ள விவேகானந்தா பாலிடெக்னிக் மாணவர்கள் கையெழுத்து இயக்கம் நடத்தினர்.



  • மாணவிகள் பேரணி அங்கன்வாடி ஊழியர் வேலை நிறுத்தம்

    சிவகங்கை: ஜல்லிக்கட்டுக்கு ஆதரவாக தமிழ்நாடு அங்கன்வாடி ஊழியர் மற்றும் உதவியாளர் சங்கம் சார்பில் நாளை (ஜன.20) வேலை நிறுத்தம் நடக்க உள்ளது.இச்சங்கத்தின் மாநில செயலாளர் வாசுகி தெரிவித்ததாவது: அகில இந்திய அளவில் நடைபெறும் வேலை நிறுத்தத்தின் ஒரு பகுதியாக சிவகங்கை மாவட்டத்தில் உள்ள ஆயிரத்து 500க்கும் மேற்பட்ட அனைத்து அங்கன்வாடி மையங்கள், மினி மையங்கள் உள்ளிட்டவற்றை மூடிவிட்டு ஒரு நாள் வேலை நிறுத்தம் நடக்க உள்ளது. அன்று சிவகங்கையில் தர்ணா போராட்டம் நடக்கிறது. 8வது ஊதியக்குழு அமைக்கும் முன்பு 20 சதவீத ஊதியம் வழங்க வேண்டும். குறைந்தபட்ச ஊதியம் ரூ.18 ஆயிரம் வழங்க வேண்டும். மினி மைய பணியாளர்களுக்கு உச்ச நீதிமன்ற உத்தரவுப்படி சம வேலைக்கு சம ஊதியம் வழங்க வேண்டும் என்பது உள்ளிட்ட பல்வேறு கோரிக்கைளை வலியுறுத்தி இந்த வேலை நிறுத்தம் நடக்க உள்ளது. இவ்வாறு தெரிவித்தார்.



  • ஆசிரியர் பயிற்சி படிப்பு மதிப்பெண் சான்றிதழ் இன்று பெற்றுக்கொள்ளலாம்

    சிவகங்கை: ஆசிரியர் பயிற்சி படிப்பு பட்டயத்தேர்வு எழுதியவர்கள் மதிப்பெண் சான்றிதழை இன்று (ஜன.19) முதல் பெற்றுக்கொள்ளலாம் என அறிவிக்கப்பட்டுள்ளது.அரசு தேர்வுகள் இயக்ககம் சார்பில் தெரிவிக்கப்பட்டுள்ளதாவது: ஜூன் 2016ல் நடைபெற்ற ஆசிரியர் பயிற்சி தொடக்கக் கல்வி பட்டயத் தேர்விற்கு இன்று முதல் மதிப்பெண் சான்றிதழ் வழங்கப்பட உள்ளது. ஆசிரியர் பயிற்சி நிறுவனம் மூலம் பயிற்சி பெற்று முதலாமாண்டு மற்றும் இரண்டாமாண்டு தேர்வெழுதிய மாணவ, மாணவிகள் அவரவர் படித்த ஆசிரியர் பயிற்சி நிறுவனங்களின் மூலமாக மதிப்பெண் சான்றிதழை பெற்றுக்கொள்ளலாம்.தனித்தேர்வர்கள் தாங்கள் விண்ணப்பங்கள் அளித்த மாவட்ட ஆசிரியர் கல்வி மற்றும் பயிற்சி நிறுவனங்களின் மூலமாக மதிப்பெண் சான்றிதழை பெற்றுக்கொள்ளலாம். இவ்வாறு தெரிவிக்கப்பட்டுள்ளது.



  • சிவகங்கையில் நாளை கடையடைப்பு

    சிவகங்கை: ஜல்லிக்கட்டு நடத்த வேண்டும் என்ற போராட்டத்திற்கு ஆதரவாக நாளை (ஜன.20) சிவகங்கையில் கடையடைப்பு நடக்க உள்ளது. ஜல்லிக்கட்டு, மஞ்சுவிரட்டு நடத்தப்பட வேண்டும் என தமிழகம் முழுவதும் மாணவர்கள், இளைஞர்கள், பொதுமக்கள் என பல்வேறு தரப்பினரும் போராட்டம் நடத்தி வருகின்றனர்.இந்த போராட்டத்திற்கு ஆதரவு தெரிவித்தும், ஜல்லிக்கட்டு நடத்த மத்திய அரசு அவசர சட்டம் இயற்ற வேண்டும். உச்சநீதிமன்றம் ஜல்லிக்கட்டு தடையை நீக்க வேண்டும். ஜல்லிக்கட்டு நடத்த தேவையான நடவடிக்கைகள் எடுக்க மத்திய அரசிற்கு மாநில அரசு அழுத்தம் கொடுக்க வேண்டும். பீட்டா அமைப்பை தடை செய்ய வேண்டும் என வலியுறுத்தி நாளை வெள்ளிக்கிழமை காலை ஆறு மணி முதல் மாலை ஆறு மணி வரை சிவகங்கை நகரில் அனைத்து கடைகளும் அடைக்கப்பட உள்ளதாக நகர் வர்த்தக தலைவர் அறிவுத்திலகம் தெரிவித்தார்.



  • சிவகங்கை அரண்மனைவாசலில் சாலை பாதுகாப்பு விழிப்புணர்வு பேரணி

    சிவகங்கை: சிவகங்கை அரண்மனைவாசலில் வட்டாரப் போக்குவரத்துத் துறை சார்பில் சாலை பாதுகாப்பு விழிப்புணர்வு பேரணி நடந்தது. எஸ்பி ஜெயச்சந்திரன் முன்னிலையில் கலெக்டர் மலர்விழி பேரணியை தொடங்கி வைத்தார். முன்னதாக அவ்வழியே சென்ற அனைத்து வாகனங்களில் உள்ள முகப்பு விளக்குகளுக்கு கருப்பு நிற ஸ்டிக்கர்கள் ஒட்டப்பட்டது. போக்குவரத்து விழிப்புணர்வு பதாகைகளை ஏந்தி நகரின் பல்வேறு வீதிகள் வழியே மாணவர்கள் பேரணியாக சென்றனர். நிகழ்ச்சியில் டிஆர்ஓ இளங்கோ, வட்டாரப் போக்குவரத்து ஆய்வாளர் முருகன், இணை ஆய்வாளர் பிரபாகரன் மற்றும் ஓட்டுநர் பயிற்சி பள்ளியை சேர்ந்தவர்கள், பள்ளி மாணவ, மாணவிகள் கலந்து கொண்டனர்.



  • மாணவர்கள் தொடர் போராட்டம்

    சிவகங்கை: ஜல்லிக்கட்டு நடத்த வேண்டும் என வலியுறுத்தி தமிழகம் முழுவதும் போராடிவரும் மாணவர்களுக்கு ஆதரவு தெரிவித்து சிவகங்கை மன்னர் துரைசிங்கம் கல்லூரி மாணவர்கள் பேரணி, ஆர்ப்பாட்டம் நடத்தினர். ஜல்லிக்கட்டு, மஞ்சுவிரட்டு நடத்த உள்ள தடையை நீக்க வேண்டும் என வலியுறுத்தி முதல் சிப்ட் மாணவர்கள் வகுப்புகளை புறக்கணித்து கல்லூரியில் சுமார் ஒரு மணி நேரம் உள்ளிருப்பு போராட்டம் நடத்தினர்.  பின்னர் அரண்மனைவாசல் வரை பேரணியாக வந்த மாணவ, மாணவிகள் அங்கு சாலையில் அமர்ந்து ஆர்ப்பாட்டம் நடத்தினர். போராட்டத்தை இரவு முழுவதும் தொடர்ந்தனர். மானாமதுரையில் ஜல்லிக்கட்டு நடத்த வேண்டும் என வலியுறுத்தி ஓ.வெ.ச. மேல்நிலைப்பள்ளி அருகில் பல்வேறு, கல்லூரி, பள்ளி மாணவர்கள் உண்ணா விரத போராட்டம் நடத்தினர்.



  • பீட்டாவை தடை செய்ய வலியுறுத்தி வக்கீல்கள் நீதிமன்ற புறக்கணிப்பு

    திருப்புத்தூர்: மஞ்சுவிரட்டு நிகழ்ச்சிக்கு எதிராக செயல்படும் பீட்டா அமைப்பை தடை செய்ய வலியுறுத்தி நேற்று திருப்புத்தூரில் வக்கீல்கள் நீதிமன்ற புறக்கணிப்பு செய்தனர்.சிவகங்கை மாவட்டம் திருப்புத்தூரில் வக்கீல்கள் சங்க கூட்டம் தலைவர் பி.கே.லியாகத்அலிகான் தலைமையில் நடந்தது. கூட்டத்தில் தமிழ் கலாச்சாரமான மஞ்சுவிரட்டு நிகழ்ச்சிக்கு எதிராக செயல்படும் பீட்டா அமைப்பை தடை செய்ய வலியுறுத்தி நீதிமன்ற புறக்கணிப்பு செய்வதென ஏகமனதாக தீர்மானம் நிறைவேற்றப்பட்டது.  இன்று (19ம் தேதி) காலை 10 மணியளவில் சங்க கூட்டம் கூடி அடுத்த கட்ட முடிவு குறித்து விவாதிக்கப்படும் எனவும் முடிவெடுக்கப்பட்டது. இதில் சங்க செயலாளர் முருகேசன் உள்ளிட்ட வக்கீல்கள் கலந்து கொண்டனர்.



  • ஜல்லிக்கட்டு நடத்தக்கோரி கல்லூரி மாணவர்கள் ஆர்ப்பாட்டம்

    தேவகோட்டை: ஜல்லிக்கட்டு நடத்தக்கோரியும், பீட்டா அமைப்பை தடை செய்யக் கோரியும் தேவகோட்டை ராம்நகர் ஆனந்தா கல்லூரி மாணவ, மாணவிகள் ஆயிரம் பேர் நேற்று கல்லூரி முன்பாக ஆர்ப்பாட்டத்தில் ஈடுபட்டனர். நீண்ட நேரம் கோஷம் போட்டு தங்களது எதிர்ப்பை தெரிவித்தனர். பின்னர் ராம்நகர் பஸ் நிறுத்தம் வரை ஊர்வலமாகச் சென்று திரும்பினர். தேவகோட்டையில் இச் சம்பவம் பரபரப்பை ஏற்படுத்தியது.



  • காரைக்குடியில் ஜன.21ல் மின்தடை

    காரைக்குடி: காரைக்குடி கழனிவாசல் துணைமின் நிலையத்தில் வரும் 21ம் தேதி மாதாந்திர பராமரிப்பு பணிகள் நடக்கவுள்ளது. இதனை முன்னிட்டு அன்றைய தினம் காலை 9 மணி முதல் மாலை 5 மணி வரை காரைக்குடி நகர் பகுதிகள், தேவகோட்டை ரோடு, அரியக்குடி, பேயன்பட்டி, செக்காலைகோட்டை மற்றும் அதன் சுற்றுப்புற பகுதிகளில் மின்விநியோகம் இருக்காது. இந்த தகவலை செயற்பொறியாளர் சித்தி அப்துல்காதர் தெரிவித்துள்ளார்.



Latest Info

Scan it with Smart Phone [Iphone / Android / Blackberry & etc.,]

Share This Page


 

Latest Info